Menu
logo
Vörukarfa
0
Opna körfu
Samtals 0 kr.

Göngum í skólann 2017

Hér má sjá nemendur Víðistaðaskóla taka þátt í setningu verkefnisins.

Göngum í skólann var sett í Víðistaðaskóla í Hafnarfirði í morgun.

  • Hrönn Bergþórsdóttir skólastjóri bauð nemendur og gesti velkomna.
  • Lárus L. Blöndal forseti ÍSÍ flutti stutt ávarp og stýrði dagskrá.
  • Óttarr Proppé heilbrigðisráðherra og Rósa Guðbjartsdóttir formaður fræðsluráðs Hafnarfjarðar fluttu stutt ávörp.
  • Nemendur úr 3. bekk fluttu tónlistaratriði fyrir gesti.
  • Aðstandendur verkefnisins, Óttar Proppé heilbrigðisráðherra, Lárus L. Blöndal forseti ÍSÍ, fulltrúar úr fræðsluráði Hafnarfjarðar, nemendur, starfsfólk og aðrir gestir settu Göngum í skólann svo með viðeigandi hætti með því að ganga lítinn hring í nærumhverfi skólans.

Göngum í skólann var sett í 11. sinn í morgun. Í þetta sinn fór setningarhátíðin fram í Víðistaðaskóla í Hafnarfirði. Hrönn Bergþórsdóttir, skólastjóri Víðistaðaskóla, byrjaði á því að bjóða nemendur og gesti velkomna. Því næst ávörpuðu Lárus L. Blöndal forseti ÍSÍ, Óttarr Proppé heilbrigðisráðherra og Rósa Guðbjartsdóttir formaður fræðsluráðs nemendur og gesti stuttlega. Í ávarpi Óttarrs hvatti hann börnin til þess að ganga eða nýta sér virkan ferðamáta og huga að umferðaröryggi. Jafnframt að það væri mikilvægt að velja sér þann virka ferðamáta sem þeim þætti skemmtilegastur og nefndi t.d. að það að dansa í skólann væri góð leið til að byrja daginn. Nemendur úr 3. bekk sungu fyrir gesti áður en lagt var af stað í göngu í kringum Víðistaðatún í blíðunni. Verkefnið var sett með viðeigandi hætti þegar aðstandendur verkefnisins, nemendur, starfsfólk og gestir gengu lítinn hring í nærumhverfi skólans

Skráning skóla hefur farið mjög vel af stað og enn geta skólar bæst í hópinn. Einfalt er að fara inn á vef verkefnisins www.gongumiskolann.is og skrá sig til leiks. Þar er líka að finna hugmyndir að framkvæmd og skipulagi Göngum í skólann fyrir skólana.

Meginmarkmið Göngum í skólann eru að hvetja nemendur og foreldra til að ganga, hjóla eða nota annan virkan ferðamáta til og frá skóla. Um leið er ætlunin að: Hvetja til aukinnar hreyfingar með því að auka færni barna til að ganga á öruggan hátt í skólann og fræða þau um ávinning reglulegrar hreyfingar. Kenna reglur um öryggi á göngu og á hjóli. Draga úr umferð við skóla: Draga úr umferðarþunga, mengun og hraðakstri nálægt skólum. Betra og hreinna loft ásamt öruggari og friðsælli götum og hverfi. Stuðla að vitundarvakningu um ferðamáta og umhverfismál: Hversu „gönguvænt“ umhverfið er og hvar úrbóta er þörf. Hvetja til heilbrigðs lífsstíls fyrir alla fjölskylduna: Hreyfing vinnur gegn hjartasjúkdómum, offitu og sykursýki II og stuðlar að streitulosun, betri sjálfsmynd, o.fl.

Á alþjóðavísu er Göngum í skólann mánuðurinn í október og Alþjóðlegi Göngum í skólann dagurinn er 4. október. Vegna birtu og veðuraðstæðna fer Göngum í skólann verkefnið fram hér á Íslandi í septembermánuði og því lýkur á Alþjóðlega Göngum í skólann deginum þann 4. október n.k.

Þeir aðilar sem að verkefninu standa hérlendis eru Íþrótta- og Ólympíusamband Íslands, mennta- og menningarmálaráðuneytið, Embætti landlæknis, Ríkislögreglustjóri, Slysavarnafélagið Landsbjörg, Samgöngustofa og Landssamtökin Heimili og skóli. 

Vefsíða verkefnisins er  www.gongumiskolann.is.

Til baka Hringdu



Gerast bakvörður