Menu
logo
Vörukarfa
0
Opna körfu
Samtals 0 kr.

Esjan tekið flest mannslíf

Á myndinni eru Smári Sigurðsson, formaður Slysavarnafélagsins Landsbjargar og Ólafur Örn Haraldsson, forseti Ferðafélags Íslands

Í dag voru afhjúpuð fræðslu- og varúðarskilti á þremur stöðum við Esjurætur. Skiltin eru við vinsælustu gönguleiðina á fjallið, Þverfellshorn, við Kerhólakamb og við Skarðsá þar sem gengið er á Móskarðshnjúka.

Mörg alvarleg slys hafa átt sér stað í Esju síðustu árin og er skemmst að minnast þess að ungur maður lést þar í byrjun þessa árs. Næstum sléttum fjórum árum fyrr lést þar kona en í báðum tilfellum voru viðkomandi aðilar á ferð með félögum sínum að vetrarlagi.

Að sögn Smára Sigurðssonar, formanns Slysavarnafélagsins Landsbjargar vanmeta margir aðstæður á þessu heimafjalli höfuðborgarbúa en að vetrarlagi er um að ræða alvöru fjall og til þess að ganga á það þarf þekkingu og réttan útbúnað.

Ofangreind slys eru ekki einu banaslysin í Esju að vetrarlagi, því árið 1979 fórust þar tveir ungir menn í snjóflóði og síðustu áratugina hafa þar verið fjölmörg alvarleg slys þar sem oft hefur litlu mátt muna. Björgunarsveitir hafa farið í útkall í Esjuna að meðaltali annan hvern mánuð, síðastliðin fjögur ár.

Páll Guðmundsson, framkvæmdastjóri Ferðafélags Íslands segir: “Esja er fjölsóttasta útvistar- og göngusvæði landsins. Gönguleiðin á Þverfellshorn er vinsælasta gönguleið landsins, þar sem tugir þúsunda ganga á fjallið ár hvert. Ferðum á fjallið að vetrarlagi hefur fjölgað gríðalega mikið og skiptir mikilu mál að fólk sem gengur á fjallið sé vel útbúið og meðvitað um aðstæður sem geta skapast þar. Þess vegna teljum við mikilvægt að setja þar upp skilti til að vara fólk við.”

Ferðafélag Íslands hefur gert áhættumat fyrir nokkrar af þekktum gönguleiðum í Esjunni og sést vel í því mati hversu krefjandi aðstæður geta orðið í hlíðum Esjunnar.

Uppsetning þessa þriggja skilta er samstarfsverkefni Ferðafélags Ísland og Slysavarnafélagsins Landsbjargar og eru félögin að skoða uppsetningu á sambærilegum skiltum á fleiri stöðum. Það er Árni Tryggvason, björgunarsveitarmaður og hönnuður, sem hannaði skiltið.

Til baka Hringdu



Gerast bakvörður