Árið byrjaði snemma hjá björgunarsveitum á nýársnótt vegna gróðurelda og þegar nýársdagur rann upp þá héldu útköllin áfram að berast. Björgunarsveitir voru kallaðar út í þrígang fyrrihluta dags vegna foktjóns, á Akranesi, Hellu og Þorlákshöfn. Lausamunir höfðu fokið, fánastöng og fiskikör á einum stað þurfti að koma matarvagni í skjól vegna veðurs.
Ófærð á fjallvegum
Um klukkan hálf fjögur voru björgunarsveitir aftur kallaðar út, þá á Akureyri og Suðurnesjum þar sem tilkynningar bárumst um fok á þakplötum. Björgunarsveitarfólk frá Akureyri var kallað út til aðstoðar ökumönnum þriggja bíla sem sátu fastir á Öxnadalsheiði. Þegar þangað var komið reyndust bílarnir vera nokkuð fleiri en var talið í fyrstu. Á endanum voru rúmlega 20 manns fluttir í skjól til Akureyrar og bifreiðir þeirra skildar eftir á lokaðri heiðinni.
Einnig lentu bílstjórar í vandræðum á fjallvegum víða á Norðausturlandi fram eftir kvöldi, á svæðinu frá Siglufirði og austur að Egilsstöðum.
Síðustu útköllin kláruðust milli níu og tíu um kvöldið og það var svo ekki fyrr en morguninn eftir sem björgunarsveitir voru ræstar út að nýju. Þá þurftu heilbrigðisstarfsmenn austur á Héraði sumir hverjir aðstoð við að komast til vinnu.